Ordning for

VIGSEL

og stadfesting av/forbøn for ekteskap

i Øygarden prestegjeld

Vigsel og stadfesting av/forbøn for ekteskap i kyrkja er handlingar med gudstenesteleg og sakramental karakter. Når ein mann og ei kvinne som høyrer inn under Den norske kyrkja ønskjer å inngå ekteskap eller ønskjer stadfesting av/forbøn for ekteskap, må dei snarast råd ta kontakt med presten eller kyrkjekontoret, og gjere naudsynlege avtalar om tid og stad. Brudefolk må og ta kontakt med Folkeregisteret i god tid for prøving av ekteskapet.

Vigsel og stadfesting av/forbøn for ekteskap i kyrkja vert førebudd ved at presten har ei samtale med brudeparet/ekteparet.

Dei einskilde delane, så som pynting og symbolbruk, må høve til at vigsel og stadfesting av/forbøn for ekteskap i kyrkja er kyrkjelege handlingar med gudstenesteleg karakter. Ein bør syne måtehald med å bruke lys, blomar og liknande. Presten ser til at dei som har oppgåver i samband med tenesta, utfører desse såleis at ho kan gjennomførast på ein god og verdig måte i samsvar med den kyrkjelege tradisjonen og gjeldande liturgi. Under tenesta kan det gjevast rom for medverknad av ulike slag. Det kan vera medverknad frå bryllaups/festfølgjet ved einskilde av dei liturgiske ledda, og det kan vera tillegg til handlinga i form av musikk eller høgtlesing, eventuelt kombinert med at det vert tent ljos i ljosgloben. Blant dei kulturelle innslaga kan det og opnast for element som understrekar den etniske bakgrunnen til brude(ekte)paret. Der den eine parten tilhøyrer eit anna kyrkjesamfunn enn Den norske kyrkja, kan det etter godkjenning av biskopen opnast for deltaking frå vedkomande kyrkjesamfunn. Både når det gjeld medverknad frå andre kyrkjesamfunn og kulturelle innslag, skal desse tilpassast den gudstenestlege karakteren til vigselshandlinga og ikkje bryta med trusgrunnlaget i Den norske kyrkja.

Innslag som kjem som tillegg til liturgien, kan plasserast etter ledd 10 Forbøn.

Der namna skal nemnast, kan ein bruka fullt namn eller førenamn, etter som det er naturleg i det einskilde tilfellet. I spørsmåla under ledd 8 Ekteskapsinngåing skal det brukast fullt namn.

Salmar og songar skal føreåt godkjennast av den presten som har tenesta. Det er mogleg, men ikkje naudsynt, at songane blir trykte på eit eige ark. Presten skal også godkjenne særskilde uttrykksformer og andre tiltak som folk ynskjer i tillegg til sjølve liturgien.

All musikk som skal framførast, må godkjennast av kantor på førehand. Vi ønskjer at det vert nytta ”levande”/akustisk musikk i kyrkja.

I søndagsgudstenesta etter tenesta, vil kyrkjelyden be for brudeparet/ekteparet i Forbøna.

Soknepresten i Øygarden

Postboks 144, 5331 Rong

TLF: 56 38 22 44 Mobil: 950 67890

sokneprest@kyrkja.net

LITURGI FOR EKTESKAPSVIGSEL

OG STADFESTING AV/FORBØN FOR EKTESKAP I KYRKJA

1 Klokkeringing

2 Inntog med bruremarsj Orgelmusikk eller annan høveleg musikk. Dersom det er ønskjeleg, kan brudeparet, ein eller båe, forlovarar, representant(ar) for familiane, prest og andre gå inn i kyrkja i prosesjon. Brudeparet kan gå saman fram til koret og setja seg på plassane sine. Deretter kan framførast høveleg vokal-eller instrumentalmusikk.

3 Inngangsord

Prest (X)I Namnet åt Faderen, Sonen, og Den Heilage Ande.

Kyrkjelyden: Amen.
P Kjære kyrkjelyd. Nåde vere med dykk og fred frå Gud vår Far og Herren Jesus Kristus.

Deretter kan brudeparet og bryllaupsfølgjet ønskjast velkomne med desse eller liknande ord:

Anten

P  Kjære  (namnet vert nemnt)  og  (namnet vert nemnt).  De er komne hit til  (kyrkja vert nemnd)  for å inngå ekteskap. Vi er samla her for å gleda oss med dykk. Vi skal høyra løfta dykkar til kvarandre og be om Guds velsigning over dykk og over heimen dykkar.

Eller

P  Kjære  (fullt namn vert nemnt)  og  (fullt namn vert nemnt),  den  (dato vert nemnd)  inngjekk de ekteskap i  (staden vert nemnd).  De er komne hit til  (kyrkja vert nemnd)  fordi de ønskjer kyrkja si stadfesting av løfta dykkar og forbøn for ekteskapet dykkar. Vi er samla for å gleda oss med dykk og be om velsigning over dykk og heimen dykkar.

Deretter kan presten seia noko om høvet og om gudstenesta som følgjer, og avslutta slik:
P  Herre, kor dyrverdig di miskunn er!
I skuggen av dine venger, Gud, søkjer menneskeborna livd.
Dei får eta seg mette av det beste i ditt hus,
du lèt dei drikka or gledebekken din.
For hjå deg er livsens kjelde,
i ditt ljos ser vi ljos. Sal 36,8-10

4 Salme

5 Innsetjingsord/Skriftlesing

Gud har skapt oss til å leva i samfunn med han og med kvarandre. Han har ordna det såleis at mann og kvinne skal vera eitt, og han har stadfest denne sameininga med si guddommelege velsigning. Ekteskapet er Guds gode gåve. Det set prøve på viljen til å dela glede og sorg, til å gje og ta imot, til å forstå og tilgje. I ekteskapet skal mann og kvinne veksa nærare kvarandre og strekkja seg i tru og von mot alt det Gud har å gje.
Guds ord vitnar om ekteskapet at det er heilagt og ukrenkjande.

Det står skrive i Fyrste Mosebok:
Gud skapte mennesket i sitt bilete,
i Guds bilete skapte han det,
til mann og kvinne skapte han dei.
Gud velsigna dei og sa til dei:
”De skal veksa og aukast,
fylla jorda og leggja henne under dykk!” 1 Mos 1,27-28a

Og vår Herre Jesus Kristus seier:
Har de ikkje lese at Skaparen frå opphavet
skapte dei til mann og kvinne og sa:
”Difor skal mannen skiljast frå far sin og mor si
og halda seg til kona si, og dei to skal vera eitt.”
Så er dei ikkje lenger to; dei er eitt.
Og det som Gud har bunde saman,
det skal ikkje menneske skilja. Matt 19,4-6
Lek kristen/P/Representant/ar for bryllaupsfølgjet Her følgjer tre lesingar, valt frå desse tekstgruppene: I Salme 23; Sal 36,6-10; Salme 91,1-2.4.9, Sal 100; Sal 103,1-5; Sal 118,1.24; Høgs 2,8-14.16-17+ 8,6-7a; Høgs 2,9-10a.13b-14; II Rom 8,38-39; 1 Kor 13; Ef 3,14-21; Ef 5,30-32; Fil 2,1-5; Fil 4,4-8; Kol 3,12b-14; 1 Joh 4,7-12; 1 Joh 4,16b III Matt 5,13-16; Matt 6,25-34; Matt 7,7-8.12; Matt 7,24-25; Joh 13:34-35; Joh 15,9-12[-17].

Den/dei som skal lesa, går samla fram til lesepulten.Kyrkjelyden sit under lesinga. Skriftlesinga vert avslutta med:

Slik lyder Herrens ord.

Her kan følgje Anten

6 Salme eller høveleg vokal-eller instrumentalmusikk

7 Preike

P held ei kort preike over eit av dei opplesne skriftorda eller over ein annan høveleg tekst.

8 Ekteskapsinngåing/Stadfesting av ekteskap

Anten ved ekteskapsinngåing

P Kom no fram til Herrens altar, så vi kan høyra løfta dykkar til kvarandre og be om Guds velsigning over dykk og over heimen dykkar.
Brudeparet går fram til altarringen. Deretter følgjer

Anten

P For Gud vår Skapars åsyn og i nærvere av desse vitna spør eg deg, (det fulle namnet til brudgommen utan tittel): Vil du ha (det fulle namnet til brura utan tittel), som står attmed deg, til ektemake?
Brudgommen: Ja.

P Vil du elska og æra henne og vera trufast hos henne i gode og vonde dagar til dess døden skil dykk åt?
Brudgommen: Ja.

P Like eins spør eg deg, (det fulle namnet til brura utan tittel): Vil du ha (det fulle namnet til brudgommen utan tittel), som står attmed deg, til ektemake?
Brura: Ja.

P Vil du elska og æra han og vera trufast hos han i gode og vonde dagar til dess døden skil dykk åt?
Brura: Ja.

P Så gjev kvarandre handa på det.
Brudeparet vender seg mot kvarandre og gjev kvarandre høgre handa.
Presten legg handa si på dei samanlagte hendene til brudeparet.

P For Guds åsyn og i nærvere av desse vitna har de no lova kvarandre at de vil leva saman i ekteskap, og gjeve kvarandre handa på det. Difor gjer eg kunnig at de er rette ektefolk, i (X)Namnet åt Faderen, Sonen og Den Heilage Ande.

Eller

P For Gud vår Skapars åsyn og i nærvere av desse vitna spør eg deg, (det fulle namnet til brudgommen utan tittel): Vil du ha (det fulle namnet til brura utan tittel), som står attmed deg, til ektemake?
Brudgommen: Ja.

P Like eins spør eg deg, (det fulle namnet til brura utan tittel): Vil du ha (det fulle namnet til brudgommen utan tittel) , som står attmed deg, til ektemake?
Brura: Ja.

P Gjenta no etter meg.

Brudgom og brur vender seg til kvarandre. Dei gjev kvarandre hendene og vert ståande slik medan dei gjev løftet. Presten les løftet ledd for ledd, deretter seier brudeparet det fram, den eine først.
P Eg tek deg (namnet vert nemnt) til ektemake.
B Eg tek deg (namnet vert nemnt) til ektemake.
P Eg vil elska og æra deg
B Eg vil elska og æra deg
P og vera trufast hos deg i gode og vonde dagar
B og vera trufast hos deg i gode og vonde dagar
P til dess døden skil oss åt.
B til dess døden skil oss åt.

Deretter vert løftet teke opp att på same måten av den andre ektemaken. Presten legg handa si på dei samanlagde hendene til brudeparet.

P For Guds åsyn og i nærvere av desse vitna har de no lova kvarandre at de vil leva saman i ekteskap, og gjeve kvarandre handa på det. Difor gjer eg kunnig at de er rette ektefolk, i (X)Namnet åt Faderen, Sonen og Den Heilage Ande.

Eller ved stadfesting av ekteskap

P   For offentleg styremakt har de lova å leva saman i ekteskap. Dette løftet tyder at de skal vera eitt og halda trufast saman i gode og vonde dagar inntil døden skil dykk åt. De ønskjer i dag at vi skal be for dykk og at ekteskapet dykkar og heimen dykkar skal stillast inn under Guds velsigning. Kom no fram til Herrens altar. Her vil vi stadfeste løfta dykkar til kvarandre og be om Guds velsigning over ekteskapet og heimen dykkar.

Ekteparet går saman fram til altaret.

P (Dei fulle namna til mannen og kvinna, utan tittel), de har for offentleg styremakt lova å leva saman i ekteskap. Vil de framleis elska og æra kvarandre og halda trufast saman i gode og vonde dagar til dess døden skil dykk åt?

Ekteparet svarar, etter kvarandre: Ja.

Her kan følgja

9 Ringar

P  Gje no kvarandre ringane, som de skal bera til teikn på løftet om truskap.

Kvar av dei set ringen på fingeren til den andre.

P  Gje no kvarandre ringane, som de skal bera til teikn på løftet de har gjeve kvarandre. Gjenta etter meg.

Presten les orda ledd for ledd, deretter seier brudeparet dei fram, den eine først.

P (Namnet), eg gjev deg denne ringen
B (Namnet), eg gjev deg denne ringen
P  som eit teikn på løftet mitt om kjærleik og truskap.
B  som eit teikn på løftet mitt om kjærleik og truskap.

Ringen vert sett på fingeren til den andre. Deretter vert overrekkinga teken opp att på same måten av den andre ektemaken.

10 Forbøn

(Brudeparet bøyer kne på altarringen. Presten ber for brudeparet, med handspålegging, ei av dei følgjande bønene, medan han seier:)

P Lat oss be.
Miskunnsame Gud og Far, du som har skipa ekteskapet og velsigna kvinne og mann, vi bed deg: Lat di velsigning kvila over (namnet vert nemnt) og (namnet vert nemnt) som her kneler for ditt åsyn. Fyll dei med din kjærleik, og bygg heimen deira i fred. Sjå til dei i nåde, og styrk dei med din Ande, så dei i gode og vonde dagar set si lit til deg, held trufast saman og hjelper kvarandre fram mot det evige livet.

Her kan følgje ein bønesalme. Om det skal haldast dåp, kjem han her. Om det skal haldast brudemesse følgjer ein messeagenden frå leddet Fredshelsing.

11 Herrens bøn anten lesen eller sungen

P Lat oss saman be Herrens bøn.

A Fader vår, du som er i himmelen.

Lat namnet ditt helgast.

Lat riket ditt koma.

Lat viljen din råda på jorda så som i himmelen.

Gjev oss i dag vårt daglege brød.

Forlat oss vår skuld,

som vi òg forlèt våre skuldmenn.

Før oss ikkje ut i freisting,

men frels oss frå det vonde.

For riket er ditt, og makta og æra i all æve. Amen.

Med føresetnad av føreåt godkjenning av prest og/eller kantor kan her følgja høveleg

12 Vokal-eller instrumentalmusikk eller opplesing

13 Velsigning og utsending

P Herren vere med dykk.
Anten

K Og med deg vere Herren.

Eller

K Og med di ånd.

P Herren velsigne deg og vare deg.

Herren late sitt andlet lysa over deg og vere deg nådig.

Herren lyfte sitt åsyn på deg og gjeve deg fred. (X) 4 Mos 4,24-26

K Amen. (Amen.Amen.)
Tre gonger tre bøneslag følgjer. Om det har vore bruremesse, følgjer:
P Messa er til endes. Gå i fred.
K Gud vere lova.

14 Salme

15 Uttog med bruremarsj

Orgelmusikk eller annan høveleg musikk. Brurfølgjet går ut av kyrkja med ektepar og forlovarar først.

Praktiske opplysningar om

VIGSEL

og stadfesting av/forbøn for ekteskap

i Øygarden prestegjeld

Kvar tek vi kontakt når vi vil gifte oss i Øygarden Prestegjeld?

Ta kontakt med prestekontoret/kyrkjekontoret på epost

kontor@kyrkja.net

eller telefonnummer +47 56 38 22 40, faks +47 56 38 22 41. Til vanleg er kontoret ope kl.09-15 mandag-fredag.

Frå prestekontoret/kyrkjekontoret får de eit innmeldingsskjema. Her kan de koma med Dykkar ønskje når det gjeld dag og tid for vigsel. De kan og få eit skjema til hjelp ved planlegginga av vigsla.

Korleis får vi klarsignal om at vi kan gifte oss med kvarandre?

Det nemnde innmeldingsskjemaet gjeld bare avtalen med kyrkja, då Folkeregisteret no har ansvaret for den juridiske prøvinga av ekteskapsvilkåra. Brur, brudgom og forlovarar må difor fylle ut og signere kvart sett av dei offentlege skjema og levere dei til Folkeregisteret. På dette grunnlaget blir det utferda Prøvingsattest frå folkeregisteret. Denne er gyldig i 4 mnd. og må vere på kyrkjekontoret seinast 14 dagar før vigsla.

Kan vi gifte oss i den kyrkja vi vil?

Dersom de vil gifte dykk i ei anna kyrkje enn i kyrkjene i Øygarden, tek de kontakt med prestekontoret/kyrkjekontoret der de vil gifte dykk. Høve til å gifte seg der kan vere avgrensa dersom dette er ei populær kyrkje å gifte seg i. De må som regel også betale ei avgift dersom de vel vigsel i ei anna kyrkje enn i den kyrkjelyden de geografisk høyrer til. Det same gjeld om de bur utanfor Øygarden og vil gifta dykk hjå oss. Meir opplysningar får de frå kyrkjekontoret.

Dersom de vil gifte dykk i ei sjømannskyrkje i utlandet, tek de kontakt via nettstaden

http://www.sjomannskirken.no

Ein kan óg sende ein e-post til Sjømannskyrkja – Norsk kyrkje i utlandet:

adm@sifh.no

telefon +47 55 55 22 55.

Kan vi gifte oss utanfor kyrkja?

Gudstenesta skal skje i kyrkja eller ein annan gudstenestestad som etter avgjerd av biskopen kan brukast til vigsel.

Kva dersom ein av oss eller begge har vore gift før, og ekteskapet er oppløyst av andre grunnar enn ved død?

Ta kontakt med prest eller kyrkjekontor for råd i ein slik situasjon:

kontor@kyrkja.net

Kva dersom ein av oss er medlem i eit anna trussamfunn eller tilhøyrer ein annan religion?

At ein av brudefolka er medlem i Den norske kyrkja, vil til vanleg vere nok for at vigsel kan skje i kyrkja. Presten har likevel høve til å nekte å vie brudefolka dersom ein av dei ikkje tilhøyrer Den norske kyrkja.

Leige av kyrkja

Andre kristne kyrkjesamfunn som står på den apostoliske truvedkjenninga og som respekterer vår ståstad, kan søke om leige av kyrkja til vigsel når eit brudepar ikkje høyrer under Den norske kyrkja, ta kontakt på

kontor@kyrkja.net

Apostelen Paulus har sagt om ekteskapet:

“Dette er eit stort mysterium.” (Efes.5,32)

Det er sant, og-spanande. Vi trur at her ligg nøkkelen til å få det godt saman.